ڕۆژی جیھانی نەخۆشی سیل
لە ڕووی چاودێریەوە ھەولێر یەکەمە
وەزیری تەندروستی : لە ٢٠ ساڵی داھاتوو نەخۆشی سیل کۆتایی پێدێت
ئەمڕۆ سێ شەممە ٢٤ی ئادار بە بۆنەی ڕۆژی جیھانی نەخۆشی سیل لە ھەولێر ڕێوڕەسمێک بۆ ئەو یادەیە بەڕێوە چوو کە تێیدا وەزیری تەندروستی حکوومەتی ھەرێم و بەڕێوەبەری گشتی تەندروستی ھەولێر ئامادەیی بوون .
لە ووتەیکدا وەزیری تەندروستی حکومەتی ھەرێمی کوردستان ئاماژەی بەوە کرد کە ڕێژەی نەخۆشییەکە بەرەو کەمبوونەوە دەچێت لە ھەرێمی کوردستان خۆشحاڵی خۆشی دەربڕی کە لە ھەرێمی کوردستان ھاوشانی ووڵاتانی تری جیھان ئەو ڕۆژەیە بەرز ڕادەگیرێت و سوودی لێوەردەگیرێت . گوتی: سەڕەڕای زۆری قەیرانەکان لە ھەرێم، بەھۆی گرنگی ئەو بۆنە تەندروستییانە ھەمیشە سوودمان لەم دەرفەتانە وەرگرتووە بۆ ئەنجامدانی چالاکی تەندروستی جۆراو جۆر بۆ ھۆشیار کردنەوەی ھاووڵاتیان و دروستکردنی ھەماھەنگی زیاتر و پیشاندانی ھاوسۆزی و پاڵپشتی زیاتر بۆ سەرخستنی ئامانجی ڕۆژی جیھانی نەخۆشی سیل و کۆتایی پێھێنانی ئەم نەخۆشییە لە ٢٠ ساڵی داھاتوو .
وەزیری تەندروستی ئاماژەی بەوەشدا لە ساڵی ٢٠١٤ تەنھا ٩٤٤ حاڵەتی نەخۆشی سیل لە ھەرێمی کوردستان تۆمار کراوە کە تێیدا لە پێنج ساڵی ڕابردوو ژمارەکە لە نێوان ١١٠٠ تا ١٢٠٠ نەخۆش بووە . ئاماژەی بەمەشدا بەھۆی ھاتنی زیاتر لە یەک ملێۆن و نیو ئاوارە ڕێژەی نەخۆشییەکە لە زیاد بووندایە ، بەڵام بەھۆی ھەوڵ و ماندووبونی دەزگاکانی تەندروستی و پزیشک و کارمەندان و بەھاوکاری بەردەوامی ڕێکخراوە نێودەوڵەتییە پەیوەندی دارەکان تواندراوە ئەوم مەترسییە سنوردار بکرێت لە ھەمات کاتیشدا وەزیری تەندروستی و رێکخراوی (undp)ی سەر بە نەتەوەیەکگرتووەکان و رێکخراوی تەندروستی جیھانی و رێکخراوی (i.o.m) دەستخۆشیان لە بەرێوەبەرایەتی گشتی تەندروستی ھەولێر کرد کەلە ڕووی چاودێری و چارەسەرییەوە تەندروستی ھەولێر پێشەنگە .
ھاوکات دکتۆر (سامان حسین بەرزنجی) بەڕێوبەری گشتی تەندروستی ھەولێر ئاماژەی بەوەدا بە گوێرەی بەدواداچوونی ڕێکخراوی who کە گەواھیدەری ئەوەبوو کە لە ھەولێر یەکەمی سەر ئاستی عێراقە کە توانیویەتی بەزووی نەخۆشەکان دەست نیشان بکات وچارەسەرییان بکات.
نەخۆشی سیل نەخۆشییەکی گوازراوەیە پەیدا دەبێت بەھۆی جۆرە میکرۆبێکەوە کە پێی دەگوترێت "چیلکەی کوخ" بەھۆی ئەوەی میکرۆبەکە لەشکڵدا وەک چلکە وایە وە زانای ئەڵمانی ڕۆبەر کوخ لە ساڵی ١٩٨٢ ئەو میکرۆبەی دۆزیەوە ئەم نەخۆشییە زۆربەی توشی سییەکان دەبێت وە ئەگەریشی ھەیە ھەموو بەشەکانی لەش بگرێتەوە و ئەیکاتە ھەوکردنێکی سینگ، خۆشبەختانە چارەسەریشی ھەیە بە کۆمەڵە دەرمانێک بۆ ماوەیەکی کەمی دیاریکراو.
ساڵانە لە جیھان ٩ ملیۆن کەس توشی نەخۆشی سیل دەبن و ٣ ملێۆن لەو کەسانە چارەسەری پێویستیان پێناگات .